തയാരകിയത്: Raiju George
എല്ലാവര്ക്കും അറിയുന്ന ഒരു അച്ചാർ ആണ് ഇത്; ബിരിയാണിക്കും, നെയ്ച്ചോറിനും അറബിക് റൈസ് നും ചേരുന്ന നല്ലൊരു അച്ചാർ ആയതിനാൽ ആണ് ഈ നോമ്പ് സമയത്തു ഇത് പങ്കുവയ്ക്കുന്നത്; എരിവും, പുളിയും മധുരവും ഉള്ള നല്ലൊരു അച്ചാർ..
ആവശ്യമുള്ള ചേരുവകകൾ:
—————————–
1 ) ഈത്തപ്പഴം കുരു കളഞ്ഞു ചെറുതായി മുറിച്ചത് – 20 എണ്ണം
2 ) ഇഞ്ചി വളരെ കനം കുറച്ചു നാരുകൾ പോലെ അര ഇഞ്ചു നീളത്തിൽ അരിഞ്ഞത് – 1 ടേബിൾ സ്പൂൺ
3 ) വെളുത്തുള്ളി വളരെ കനം കുറച്ചു നീളത്തിൽ അരിഞ്ഞത് – ഒന്നര ടേബിൾ സ്പൂൺ
4 ) പച്ചമുളക് പൊടിയായി അരിഞ്ഞത് – ഒന്നര ടേബിൾ സ്പൂൺ
5 ) കറിവേപ്പില പൊടിയായി അരിഞ്ഞത് – ഒന്നര ടേബിൾ സ്പൂൺ
6 ) മഞ്ഞൾ പൊടി – അര റ്റീസ്പൂൺ
7 ) മുളക് പൊടി – രണ്ടര റ്റീസ്പൂൺ (കശ്മീരി ആണെങ്കിൽ മൂന്നര വരെയാകാം)
8 ) കായം വറുത്തു പൊടിച്ചത് – ഒരു റ്റീസ്പൂൺ
9 ) ഉലുവ വറുത്തു പൊടിച്ചത് – അര റ്റീസ്പൂൺ
10 ) കടുക് – ഒന്നര റ്റീസ്പൂൺ
11 ) തിളച്ച വെള്ളം – ഒരു കപ്പ്
12 ) വിനാഗിരി (ചൊറുക്കാ) – ഒരു കപ്പ് (പുളി അനുസരിച്ചു; തെങ്ങിൻ ചൊറുക്കാ ആണ് കൂടുതൽ രുചി)
13 ) ഉപ്പു – ആവശ്യത്തിന്
14 ) നല്ലെണ്ണ – 6 ടേബിൾ സ്പൂൺ
തയ്യാറക്കുന്ന വിധം:
——————-
1 ) ഒരു ചീനച്ചട്ടി ചൂടാക്കി കടുക് പൊട്ടിച്ചു ഇഞ്ചിയും വെളുത്തുള്ളിയും ഇട്ടു നന്നായി മൂപ്പിച്ചു ഇളം ബ്രൗൺ ആയി തുടങ്ങുമ്പോൾ അതിലേക്കു പച്ചമുളകും കറിവേപ്പിലയും ഇട്ടു മൂപ്പിച്ചു വഴറ്റുക തീ ഓഫ് ചെയ്യുക
2 ) ഇതിലേക്ക് മുളക് പൊടി, മഞ്ഞൾ പൊടി, ഉപ്പു, കായപ്പൊടി, ഉലുവപ്പൊടി എന്നിവ ചേർത്ത് ഒന്നിളക്കി തീ ഓൺ ചെയ്തു ഒന്ന് മൊരിയിക്കുക (തീ ഓഫ് ചെയ്തു പൊടികൾ ചേർത്തത് കരിഞ്ഞു പോകാതിരിക്കാനാണ്)
3 ) അതിലേക്കു അരിഞ്ഞു വച്ച ഈത്തപ്പഴം ചേർത്ത് നന്നായി ഇളക്കുക; അഞ്ചു മിനിറ്റ് കഴിയുമ്പോൾ തിളച്ച വെള്ളവും വിനാഗിരിയും ഉപ്പു നോക്കി ഉപ്പും ചേർത്ത് നന്നായി അഞ്ചു മിനിറ്റ് തിളപ്പിക്കുക; കുറുതാക്കി തീ ഓഫ് ചെയ്യുക;
അച്ചാർ ഒരുപാടു ലൂസ് ആകരുത്; നന്നായി എണ്ണ വേണം.. എണ്ണ മുകളിൽ തെളിഞ്ഞു നിന്നാലേ കേടാകാതെ ഇരിക്കൂ… ഉപ്പും, മുളകും കായതിന്റെ രുചിയും അച്ചാറിൽ മുന്നിട്ടു നിൽക്കണം… ചൊറുക്കാ ചേർത്ത് പുളി ക്രമീകരിക്കണം… നന്നായി വെട്ടി തിളച്ച വെള്ളമേ അച്ചാറിൽ ചേർക്കാവൂ.. ഇല്ലെങ്കിൽ പൂത്തു പോകും… ഇത്രയും ശ്രദ്ധിച്ചാൽ നല്ല രുചിയൂറും അച്ചാർ റെഡി
(അച്ചാറുകൾ ആരോഗ്യത്തിനു ഹാനികരം… ഇത് പറയാതെ വയ്യ… )
